السلام عليكم ورحمة الله وبركاته

خوكم قريب بيسكر شهر لأول مدة معاي في اشتارك ADSL ... ولقيت الحصة الشهرية قريب بتم ... قلت خليني انعبي رصيد خير ... المهم شريت 2 كروت 10 دينار وعبيتهم والأمور تمام ... امتى خشيت على رصيدي من الموقع لقيت الرصيد امشي لـ DialUp ... مش للــ ADSL ... قصدي هل في مشكلة ولا بعد ما يتم البوانديث امتع الشهر الأول بعدين يتحول الرصيد لـ ADSL ... خوكم أول شهر ليه على ADSL ... ومش عارف شي ... ياريت اتساعدوني بسرعة ... شوفو الصور ..

http://www.up7up.com/pics/L/6/1195714147.jpg

http://www.up7up.com/pics/L/6/1195746952.jpg

ونبي نعرف شين قصة امتع الحصة الإضافية ؟؟ ... معليش سامحوني على الازعاج ..

ومنورين يا شباب ...

والسلام عليكم

اخي الغالي

امورك تمام ومافيش الحمدلله عندك اي مشكله وزي ماقلت بعد تنتهي المده تلقائي يخصم منك

للشهر الجديد يعني يوم 24/11 اما الحصه الاضافيه فهي تعني الزياده اللي تستهلكها فوق حصتك

من الميجات المخصصه لك للاستخدام ويحسبوك عليها علي كل ميجا استهلكتها وممكن تلغيها لكن

ان كان كملت حصتك من الميجات المخصصه ليك كملت تستني للشهر الي بعده باش تنزلك الميجات

الخاصه بالشهر الجديد الي هي حصتك الشهريه علشان تقدر تستعمل النت بال ADSL لكن ممكن

تقعد نشتغل ب DialUp انشاء الله الصوره وضحت بالتوفيق

السلام عليكم ورحمة الله وبركاته

مشكور جدا على الشرح يا اخي TOWEIR... والصورة صافية طلعت عندي ... بوركت ... بس عندي سؤال ثاني بالنسبة للحصة الإضافية ... سعر الميجا نفس السعر العادي؟؟ ... يعني لو فعلت الحصة الاضافية ومثلا استخدمت 200 ميجا ... هل تنخصم بنفس السعر ولا بسعر أعلى ؟؟؟ ان شاء الله فهمت شين قصدي ...

ومشوكر جدا

والسلام عليكم

هي مفعله اساسا انت ممكن توقفها بس والسعر علي حسب ماعلم اعلي اعتقد ان كل واحد قيقا اضافيه

ب10 دينار وااله اعلم راهو معلوماتي قديمه شويه لكن هذا اللي كان ماشي قبل والي نعرفه

تحياتي

زي ماقالو الشباب شرحهم يكفي لكن ارجو منك اقفال الحصة الاضافية لكي يخصم منك

بسم الله الرحمان الرحيم

كانك مازال ماوقفتش تفعيل الحصة الإضافية باش ما تخسرش 10 دينار توا برا للتلفون اتصل ب 116 و دير زي لما ادير باش تعبي رصيد و بدل ادير رقم 1 دير رقم الاستعلام عن خدمة adsl و شوف قداش ما زالك كانه شوية هلبة 2 ميجا او اقل برا كمل اقرا الموضوع من صالة نت (طبعا كان ماتبيش تخش لصالة نت تقدر تستعمل الدايل اب لكن ماتزيدش على ساعتين احتياطا) و كان مازال 3 ميجا فما فوق كمل معاي خش على موقع ال ltt
و عطل تفعيل الحصة الاضافية اضغط زر الغاء التفعيل لانه كان خليته و تمت الحصة الشهرية ممكن يخصموا 10 دينار من الرصيد و يعطوك 500 ميجا او حوالي 500 ميجا بس و بعد يتم المدة حتى لو عندك مازال فيه حصة شهرية ما تمتش بيصفرولك الحصة الشهرية(حتى الحصة الاضافية) و يخصموا 20 دينار باش يتجدد الاشتراك إن شاء الله و كان مافيش 20 دينار مسكرات مش حيتجدد لين تسكر 20 دينار في رصيدك
قصدي هل في مشكلة ولا بعد ما يتم البوانديث امتع الشهر الأول بعدين يتحول الرصيد لـ ADSL
لا بعد يتم اشتراكك الاول يتحول الرصيد الى ال adsl
ونبي نعرف شين قصة امتع الحصة الإضافية ؟؟ ... معليش سامحوني على الازعاج
الحصة الاضافية : 10 دينار = 500 ميجا


هي مفعله اساسا انت ممكن توقفها بس والسعر علي حسب ماعلم اعلي اعتقد ان كل واحد قيقا اضافيه

ب10 دينار وااله اعلم راهو معلوماتي قديمه شويه لكن هذا اللي كان ماشي قبل والي نعرفه


بالنسبة للحصة الإضافية قبل : 10 دينار = 50 ميجا

بسم الله الرحمان الرحيم

أدخل للموضوع هذا http://www.alhandasa.net/forum/showthread.php?t=141927

السلام عليكم ورحمة الله وبركاته

خلاص ... وقع الفأس على الرأس .... اتروبنت ... خصمو مني 10 دينار مقابل 500 MB فقط ... ... الله غالب ... قلت خليني انطيح فيها داون لود وخلاص خير مايمشو هكي بلاش ...
المشكلة كرهت الـDialup .... نفخ مش عادي ووجع راس ... وخاصة بعد ما اصبحت نستخدم في ADSL ... لكن هي الله غالب المرة هاذي زلبحوني ... والواحد يتعلم المرة الجاية معاش يفعل الخاصية امتع الحصة الاضافية ... ومشكور لكل الإخوة على المساعدة ..

جزاكم الله خيراً ...

والسلام عليكم

بسم الله الرحمان الرحيم

عفوا
رد بالك تخلي منهم كيلو بايت متريحاش

السلام عليكم ورحمة الله وبركاته

رد بالك تخلي منهم كيلو بايت متريحاش

درت جهدي ... اجدد البرامج نزلتها ... وجميع التحديثات البرامج درتها ... ومازل فضلوا حوالي 250 MB ... والمشكلة غدوة بيتم الاشتراك ... الله غالب ... ربي يسامحهم ...حتى هما 2.5 دينار ... زيدهم ربع جنيه يبدو حق مالبورو ... :lol:

مشكور جدا على مساعدتكم

والسلام عليكم

بسم الله الرحمان الرحيم

ياودي قصرت فيها هادي كيف تفضل 250
على فكرة زادوك شهر مجانا ؟

السلام عليكم ورحمة الله وبركاته

على فكرة زادوك شهر مجانا ؟

ما فهمتكش يا خوي .... شينو هو الشهر المجاني.

وعلى فكرة .. الحصة المتبقية من الشهر الأول تم إضافتها مع الــ7 قيقا امتع الشهر الجديد .. واني ظلمتهم, بارك الله فيهم... وشوفو الصورة.

http://www.up7up.com/pics/L/7/1195900556.jpg

والسلام عليكم

بسم الله الرحمان الرحيم

ما فهمتكش يا خوي .... شينو هو الشهر المجاني.

إذا انت مسجل من تاريخ 16-9-2007 إلى 22-10-2007 فالمفروض إنه ايزيدوك شهر مجانا من غير ما تدفع لانه بسبب الانقطاعات اللي حصلت الشركة قدمت هذا كتعويض للمشتركين
وعلى فكرة .. الحصة المتبقية من الشهر الأول تم إضافتها مع الــ7 قيقا امتع الشهر الجديد
لا لا هذا ممكن إستخدامك متع اليوم اللي مشي أما إذا كنت تقصد اللي زايد عن ال 7000 ميجا فلأنه
1 جيجا = 1024 ميجا و بالتالي
جيجا7*1024ميجا= 7168 ميجا
إجمع اللي استهلكته و المتبقي و شوف النتيجة

والله أعلم

السلام عليكم ورحمة الله وبركاته

جيجا = 1024 ميجا و بالتالي
جيجا7*1024ميجا= 7168 ميجا
إجمع اللي استهلكته و المتبقي و شوف النتيجة

حي حي حي على الحشمة ... كيف قاريها السيمستر اللي فات في مادة تنظيم حاسبات ... ومصفيها المادة بـ 98 ..:lol: ... والله ما انتبهتلها بكل ... هذا كله فرحان بالنت ... مشكور جدا ... حي حي عليك حشمة وخلاص ...

والسلام عليكم

بسم الله الرحمان الرحيم


مادة تنظيم حاسبات
وين تقرا فيها المادة هذي؟
وعفوا


سبحان الله و بحمده سبحان الله العظيم

السلام عليكم ورحمة الله وبركاته

تجنبا للردود الجانبية .. كلمني على البريد الخاص امتع المنتدى ...

والسلام عليكم

سؤال

نقدر انفعل الحصة الاضافية .بعدين نلغيها
معاش عندى ميجات ومازال 3 ايام يعنى نقدر انفعلها لمدة 3 ايام وبعدين نلغى التفعيل والباقى يقعدلى؟

جاوبونى بسرعة

السلام عليكم ورحمة الله وبركاته

معاش عندى ميجات ومازال 3 ايام يعنى نقدر انفعلها لمدة 3 ايام وبعدين نلغى التفعيل والباقى يقعدلى؟

تقدري تفعليها وبعدين تلغيها ... لكن الباقي من الاضافي يتبخر ... ويتصفر العداد من جديد ... ويصبح 7 قيقا ...
وانتبهي بالنسبة للحصة الإضافية يخصمو منك 10 دينار ويعطوك مقابلها 500 MB ....

وان شاء الله تكوني فهمتي ....

والسلام عليكم