قصيدة فكاهية ودمها خفيف للشاعر رمضان أبو سلة إنشالله تعجبكم


تفهم جدايا في الطب =دنيا وعجب
ودكتورة من غير كتب

قالت جدايا = نا عمري ماعرفت قراية
ولاحاجة سماها محاية =ولابيرو بالحبر يصب
ولاكراسة ولا براية=ولامعمل فيه تجارب
ولا قعمز طالب بحدايا= سمايا مانعرف نكتب
حدايا من العالي مولايا =دوايا راسي ومجرب
العيل كان فيه العواية=نزازيه ويمشي يلعب

*********
قالت مانعرف صورة =ولانعرف طب وتنتورة
لادمل عدِّن لادورة=لا مواس جراحة تلعب
ولانوقف فوق السبورة=باش نكتب سامي ورجب
العيل لو رجله مكسورة=نجبّرها تجبير عرب
نداويه ويمشي في شورة =ويبري كان الله كتب
********
قالت مانعرف سمّاعة=بتلزمني في تشخيص الحالة
نا دوايا كل شيء قبالا =بحاجات بسيطة مركب
مريضي بنجيبلَّه العالة =نولع في الكانون حطب
إن كان بطنه تجري سيالة = بنطبخله براد عشب
ولانقوله برا ولا تعالا = ولا ارجعلي تالي واتعب
*******
قالت نا مريضي يشفي = وبدون يخش المستشفي
ولا اشعة تنزل في كشفه = ولا وصفة ليه بنكتب
ولا شروبوا ياخذ بالرشفة = ولا حبوب علي ثلاث وجب
نخرج ونداوي لين يشفي =ان كان فيه احساسي يرحب
***********
قالت نا جداك ذكية=ولا شيخ ضربني علي يدية
ولاحاجة سماها كلية =ولاعطتني الأبلة واجب
نداوي في حاجة رسمية =بنوصفها عنك تصعب
اللي عنده مرض الصدرية =جغوم حلبة لازم يشرب
دوا اللي عنده حالة نفسية =عسل مع كسبر ذايب
**********
قالت نا جداك مرتاحة =ولانطلب قرض ولاراحة
ولامدير في كل صباحة=يسجل في من هو غايب
ولانخدم كيف الطلفاحة =بنغضب كان قصوا الراتب
نقولهالك بكل صراحة= إنت جيلك هذا يشيب
*********
الشاعر ماعجباش الكلام اللي قالاته جداه علي جيله ...فرد عليها :


قلتي اللي بدك =وخليتك قلتي ماسدك
ياجدايا كفي حدك = نا جيلي ماهو سايب
جيلي واقف للي ضدك = من العيب تقولي خايب
وجيلي من المصنع بيمدك =بحليب حكاك معلب
********
الجدة :

نا حليبك مانضوقه =ولاني لحليبك محقوقة
حليب خامر قاعد في سوقه=عليه زحمة ودفان وقب
ونا سلم عنزي المطلوقة =بيديا هاذم نحلب
لبني كيف المسك نشوقه=مالي الحلابة رايب
********
الشاعر :

قلها لبنك ياجدة = باسل صامت مايتعدي
بيدير الفدة = قارص صامت زي الشب
عنك بنرده =تحشمت لقيته صاعب
*********************
الجدة : إنت ترد بقر وتدير كبر ...ليش


لأنك جيل بلاعقيدة =وجيل معادي أمه وسيده
والسبسي ديما في إيده=راقي دخانه يعسلب
تي والله لوفيه جريدة = تو تولي وتتأدب
**********************

ErHaBi

الله يبارك فيك وفي الجدة واللي برهنت ان الطب الشعبي مزال فيه من يتداوى بيه
والطب الشعبي أثبت فاعليته في الكثير من الحالات بالرغم مما نراه اليوم من تطورات هائلة في مجالات الطب الحديثة وتقنياته

مشكور ياغالي
والسلام عليكم

منور ربي يعزك

الســـــلام عليكم ..

منور يا إرهابي .. حلوة القصيدة بجديات ..

و اللي عنده زيادة .. ما يبخلش علينا !!

:D

مشكور جدا

بارك الله فيك ومشكور