السلام عليكم ورحمة الله وبركاته



قصيدة حكايتي مع البحر للشاعر الواعد رمزي بلقاسم العقوري




عندي حكاية يابحر كاميها ......ولغيرك مانقدر لحد نحكيها
حكايتي مااطولها ...حكاية صعيبة شايكة من اولها
كان عندك حل يابحر ديرلها ....والا اسمعها وعندك يابحر خليها


برادتي نحكيلك يابحر ونبوح ......بحكاية خلفتلي في القلب عديد جروح
تميت منها ضايع امغير انوح .....وفي وسط الصدر كاميها

حكاية غرام جرتني......في حب نبيه متذيبل بكَل خلتني
سنين وراها تاعب واجد شقتني.....سمرت عيني ..وما با النوم يجيها

بعد ماوصلت لاخر المشوار.....وبعد ماكميت في قلبي عديد اسرار
مشيت وحكيتلها بالَلي معايا صار......عرفت انها مش حاسة بيا وحكايتي ماتعرف ولا شئ عليها

كلام لي قالاته....كلام جرحني وهي ماقصداته.....كلام كما سكين في قلبي غرساته....هدم جميع امالي واحلامي اللي قبل انا بانيها

لكن !! شعفة توبة .....ماعاد نمشي مع الغرام وادروبة .....ولا اندير فيك يادنيتي محبوبة..... ونعيشها حياتي كيف مانبيها


بعد ماكملت الحكاية اللي واجعتني.....صبت موجة تبكي......علي شط البحر ظمتني

وقالت حكايتك ماشاف البحر طاريها

كلمات معبرة
تحياتى

كم هو صعب ان تحب شخص لا يحبك,لكن كلماته لك تحتوي بين طياتها على كلمات حب,ولكن بعد دلك تكتشف انك كنت تحلم.وتصحو على صدمة كبرى.

قصيدة عندي حكاية للشاعر بوبكر رابح السعيطي



عندي حكاية يا بحر كاميها .. أمفيت انت ما عندي لمن نحكيها

حكاية غالي .. عدّا وخلالي سمور ليالي

هو غاب وانا زاد غاب دلالي .. وخلا العين ديما منفلت ماقيها

يمين حالفه ما عاد تالف والي .. رضيت الياس وياسها راضيها

لا لها عدو ولا عاد تريد غوالي .. رصيد م الكواين عزها يكفيها

ولا تريد ضحك ولا تريد تسالي .. تعشق الحان الياس وتسليها

يجتمعو مع نسمة الليل التالي .. عطاشنه اتجيه وكاسها يسقيها

ولمباكر تنوض مهوطه وتخالي .. مفعوله قوي بالحيل ومقسيها

ونا يا بحر تميت كاره حالي .. لا عرفت ننهاها ولا نرخيها



حكاية ياسي .. الطايل اللي منه اكبر وسواسي

على اثر موح مستاصل ابقي مجلاسي .. صعب مع اللي قعدته شاهيها

والوق ت جرني جرة زعيم سياسي .. دخلني دروب ضلال ما نبيها

واعدمني الثقة في قرايب ناسي .. كامي عليها ما لحد نشكيها

علي صغر سني ذقت مرّة كاسي .. مفطوم ع الكواين فرحتي ناسيها

و لا ارضيت لا نرضى نواطي راسي.. الدنيا سواء عندي الله ناشيها

ولا نقترب م اللي كبار كراسي .. عصران نفس خالقها الله يغنيها

وحتى ان كان هو بيد حديده فاسي .. جبال دنيتي لازم انخش عليها

يا نموت فيها يا يصير خلاصي .. ونلقى اصحاب عقول ونغاليها

وما خانّي صادق معاي احساسي .. متوقع بشاير خير مستوحيها

ايجي يوم ونثور ضد افلاسي .. ونركن قوانينه ونستثنيها

وتسمع بعد سكتة اصوات اجراسي .. تعلن لحظة فرح متمنيها

وانت يا بحر للصوب فيك مراسي .. لازم ابواخر العاشقين اتجيها

وانت سبب عله وفيك مآسي .. يصيرن امغير الموج يمحا فيها

ونا علي شطك نفضت اكياسي .. حكيت لك بقصة للنجوم ارويها

القصيدة لمنو ..للسعيطي ولا للعقوري ...نرجو التوضيح

القصيدة الاصلية هي للشاعر بوبكر رابح السعيطي
الي كاتبها خونا احمد الحوتي

والقصيدة متاع العقوري هوا اخذ مطلعها وكمل عليها

القصيدة الاصلية هي للشاعر بوبكر رابح السعيطي
الي كاتبها خونا احمد الحوتي

والقصيدة متاع العقوري هوا اخذ مطلعها وكمل عليها

يعني الاصل لسعيطي

والقصيدة متاع العقوري هوا اخذ مطلعها وكمل عليها

مشكور علي التوضيح يا فريستر ...مش في بالي قصيدة وحدة

لا هيا القصيدة مش وحدة
كل وحدة بروحها ياعمرو

صحيت يا خويه لايهم من قائلها المهم
يا اخوانا ان القصيده ماتحمله من معانيها
والمهم ايضا ان نهتم بتراثنا يا اخوانا ياريت
نكثرو من هذه المواضيع عشان اخوانا الي
مايعرفو التراث الشعبي يعرفوه على اصوله

عندي حكاية يا بحر كاميها .. أمفيت انت ما عندي لمن نحكيها
حكاية غالي .. عدّا وخلالي سمور ليالي
هو غاب وانا زاد غاب دلالي .. وخلا العين ديما منفلت ماقيها
يمين حالفه ما عاد تالف والي .. رضيت الياس وياسها راضيها
لا لها عدو ولا عاد تريد غوالي .. رصيد م الكواين عزها يكفيها
ولا تريد ضحك ولا تريد تسالي .. تعشق الحان الياس وتسليها
يجتمعو مع نسمة الليل التالي .. عطاشنه اتجيه وكاسها يسقيها
ولمباكر تنوض مهوطه وتخالي .. مفعوله قوي بالحيل ومقسيها
ونا يا بحر تميت كاره حالي .. لا عرفت ننهاها ولا نرخيها

حكاية ياسي .. الطايل اللي منه اكبر وسواسي
على اثر موح مستاصل ابقي مجلاسي .. صعب مع اللي قعدته شاهيها
والوقت جرني جرة زعيم سياسي .. دخلني دروب ضلال ما نبيها
واعدمني الثقة في قرايب ناسي .. كامي عليها ما لحد نشكيها
علي صغر سني ذقت مرّة كاسي .. مفطوم ع الكواين فرحتي ناسيها
ولا ارضيت لا نرضى نواطي راسي.. الدنيا سواء عندي الله ناشيها
ولا نقترب م اللي كبار كراسي .. عصران نفس خالقها الله يغنيها
وحتى ان كان هو بيد حديده فاسي .. جبال دنيتي لازم انخش عليها
يا نموت فيها يا يصير خلاصي .. ونلقى اصحاب عقول ونغاليها
وما خانّي صادق معاي احساسي .. متوقع بشاير خير مستوحيها
ايجي يوم ونثور ضد افلاسي .. ونركن قوانينه ونستثنيها
وتسمع بعد سكتة اصوات اجراسي .. تعلن لحظة فرح متمنيها
وانت يا بحر للصوب فيك مراسي .. لازم ابواخر العاشقين اتجيها
وانت سبب عله وفيك مآسي .. يصيرن امغير الموج يمحا فيها
ونا علي شطك نفض اكياسي .. حكيت لك بقصة للنجوم ارويها

انزاحت داره .. اليوم يا بحر عني عزيز توارا
عدّا وخلا ف الكنين اشاره .. مرسومة وما اساع صار ما يمحيها
ولنظار تمن حايسات سماره والنفس شارها قعده مع غاليها
تناوض علىغفلات لوعة ناره .. ونصبي بحيل جهدي ونوا طيها
اووين ما درست القيتا منهاره .. افكاري قديمة بذكره ارابيها
وقعة خواجه في عرب قمّاره .. علايل وهم وياس متكفيها
وقعت بينهم وانست كل اخباره .. الغالي وتمن هن اسباب التيها
وانت علي شطك هناك مناره .. ترشد التايه من بعيد ايجيها
قصيده تعب يا هوه بلاهى شنو رايكم فيها

السلام عليكم
يا شباب القصيده لشاعر بوبكر رابح المغربى من مدينة اجدابيا وهى اول قصيده طلعت على مطلع عندى احكايه يا بحر كاميها التى كتبها احمد الحوتى
وانا مستغرب انى انا نزلت القصيده فى الايام القليله الما ضى ولكن لقيت الشباب امنزلينها ابسماهم
ارجو التوضيح
فى امان الله

الاخ منعم
قصيدة عندي حكاية قصيدة مشهورة وقد قام العديد من الشعراء باخذ مطلع بيتها واكمالها
انا طبعا قمت بدمج موضوع مع هذا الموضوع وانت علي فكرة لم تذكر اسم الشاعر في القصيدة التي قمت بنقلها
المهم القصيدة الاولي في هذا الموضوع من الشاعر الواعد رمزي العقوري والقصيدة الثانية التي قام بنقلها العضو احمد الحوتي هي للشاعر بوبكر رابح السعيطي
وانت القصيدة التي قمت بنقلها لم تذكر من قائلها في البداية وكويس انك جبتلنا اسم الشاعر الي قالها الي هو بوبكر رابح المغربي مش عارف هل هوا نفسة بوبكر رابح السعيطي والا لا
المهم تم دمجهم مع بعض عشان تقعد كيف الموسوعة لقصائد عندي حكاية يابحر
واتمني من الجميع ذكر اسم الشاعر لاي قصيدة يقوم بنقلها من جديد
سلام

السلام عليكم
بارك الله فيك يا اخى على التوضيح لكن القصيده لى منزله انا هى نفس القصيده لى منولها احمد الحوتى
والقصيده لشاعر بوبكر رابح المغربى لنا ما فيش شاعر اسمه بوبكر رابح السعيطى
فى امان الله

تامنو بالله يا اخوان انى كنت ناوى نكتب نفس القصيده اللى كتبها اخى الحوتى وحق من رفع السماء من غير عمد انك تاخدها من السانى سبحان الله

بالاماره شريط ضمت قشه وفيه القصيده هدى وبيتين اللى هما

عيونى ملايا دمع وين ايلقن ...... لا بددن ولا بالعزيز ايطقن
وضمت القشه اتقول وحدا فيهن
ميت وما ادفنونى اجنازه نمشى للعرب ويجونى بلا امنايتى بلا امنايتى


تحياتى

وين باقى القصيدة؟؟؟؟؟؟؟؟؟؟؟؟؟؟

لأن

فيها مقطع ايقول:
حكاية غربة ****** احكاية الطير الى امفارق سربا

مشكور ياخونا على القصيد الرائع ونحي الشاعران السعيطي و العقوري

جل من لا يخطى

جل من لا يخطى المهم ان ندكر بما هو منتسى وما هو غلط ونصلح الخطاء مع اى عضو من الاعضاء

انا واعود بالله من كلمة انا مرات يحضر اسم صاحب القصيده وندكر اسمه ومرات نغلط

بس عندى قصايد واجد من غير صاحب كتبت بعضها ومازال نكتب دامنى حافظ بيش نعرف صاحب القصيده

وكان فى ابيات ناقصه او فى غلط فى الحفظ


والله اعلم والله الموفق فيما فيه خير

يا اخواني بوبكر رابح مش اسعيطي بوبكر رابح مغربي من عيت بو نشاشة
وين القيت السعيطي يا احمد جمعة سالم الحوتي

وقصيدة ابوبكر ابروحها وقصيدة اخينا العقوري ابروحها والناس يقولو راس البيت مش ملك لحد