قصيدة (( ليبيا الوادي )) هي اطول قصيدة من نظم شاعر واحد في تاريخ الشعر الشعبي الليبي وصاحب هذه القصيدة هو الشاعر الشاب ( عبدالباسط اغنية - 25 سنة ) وهو من منطقة بني وليد.
ويربو عدد ابيات القصيدة عن 1000 بيت اشترك الشاعر بـ600 منها في المهرجان الثاني للشعر الشعبي - 2001 فنال الترتيب الاول

هنا جزء من هذه القصيدة:

الوادي بوشيوخ نواوير .. ماضيه شهير .. وبولاده في خيار الخير
........................
الوادي اللي يخص التشريــف ... دوام علي ساير ليـــــــــام
اللي معروف بلا تعريـــــــف ... ولا قول ولا خط اقــــــــــلام
اللي ناسه كي حد السيـــــف ... تكسر في خشوم الظــــلام
عرب بيت مبجد عالكيــــــــف ... رواقات وجبر وكمـــــــــام
زوازل مالسدر مهاديــــــــــف ... بكرباته لا فوق انقــــــــام
امقشط بحبال من الليـــــــــف ... وحلفا ولمها الــــــــــــولام
بتاته حاضيه تزخريــــــــــــف ... علي لون الوان الرســــــام
يبانن كيف الوان الطيـــــــــف ... وسايد ومرقم وكـــــــــلام
عرب بنت ام وجاب لطيــــــــف ... الحره المسروبه الحشـــام
اللي كيف الجازي في الصيف ... زوي مكه عالصيد حـــــرام
عرب ديمه تكرم في الضيـــف ... تضل لخاطرها خـــــــــــدام
عشا الخاطر ماله تصريــــــف ... ولوكان يباتو صيـــــــــــام
عرب كوت إليا فز خفيـــــــف ... الدير يخلي فيه اقســــــام
بلا مس اركابات عفيــــــــــف ... نحيبه ديما لاقـــــــــــــدام
عليقة من غير تضيريـــــــــف ... تجي مخلاته هيل اجمــــام
امنين الخاوي يدير زنيــــف ... وتبدا تجارد لقــــــــــــــوام
يجو فوق سماح هفاهيـــف ... بلون مغاثات الحجــــــــــام
دلايل يرحن في الصرفيـــف ... عقود تقول اسراب حمـــــام
يهدو عالنار مشاريـــــــــف ... الهرمة واللي دوبه صـــــام
يخلو في الضد محاذيــــــف ... مفرش كي جذر الغـــــــرام
عرب ماتمشيش علي حيــف ... ولا تقبل في الحي اســـوام
عصارة ماهمش سفاسيـــف ... نغاغير يعدو المــــــــــــلام
رواسي ليا صار تدفديف .. وصار نفير .. تقول جبال حجر وحجير

الوادي المحروس الموصــان ... اللي مش غابي في المنعات
اللي متمرس ما يليــــــــــان ... عصي كي توا كي مافـــات
اللي قبل يبوه العـــــــدوان ... مجزي بالتقسيــــم اتــلات
يبوه اويا وبرقة وفــــــزان ... يبو ديره تلت ولايـــــــــات
الوادي اللي عز الرهقـــــان ... وعز الخايف في الخاخــات
اللي فيه يباتن فرقــــــــان ... نجوع ضفايف منطرحات
اسماهن ماهو للغبيـــــــان ... بفعل عربهن منبيــــــــات
حضنهن من بر الســـــودان ... ليا ساحل درنة وشحـــات
من الكفرة لوين البطنــــان ... تلاقت هيه وبو موجـــات
من امساعد لابن قــــــردان ... لمانغني وهالمفـــــــازات
من البردي لعــين الــــــزان ... ومن وازن للعوينـــــــات
امتدت عجلاها مـــــــــــدان ... بطوله صفات بصفــــات
محاميد وعرفة ومعــــــدان ... حبون ودرسة وعبيــدات
والاهالي وشرفـــــــة ودان ... وحاسة وقماطة وبركات
عوام وترهونة وفرجــــــان ... هوانة ويدر وعجيـــلات
نوايل واهالي غريـــــــــان ... وورشفانة ومشيطـــــات
مشاشي وبوسيف ودرمــان ... وفيه شواعر ورقيعـــات
وفيه مساعيد وصيعـــــــان ... ولفواتير ولبشيــــــــرات
وضنى سي جبريل وصرمان ... ونجع امالك وعريبـــات
رعايا ورياح ورجبـــــــــان ... وشد وحوته وقناشــــات
زوية وزناتة وحشــــــــــان ... وفيه ربايع وشهوبــــات
ورملة ويامي ومليــــــــدان ... وحراس ونجع حــــــرارات
عمايم وحسون ويمنــــــان ... ونجع ورنزة وسنينـــات
وفيه جوازي وذكيـــــــران ... وسيلين وفيه جهانـــــات
حرار وعباد وزغــــــــــوان ... ونجع اماجر وحميـــــــدات
وندباس وحمي وقطـــــران ... وفقهة وتاسة ورفيفـــــات
وفيه ذويبات وطرشـــــــان ... وزرقان ونجع السعفـــات
سوالم وادناف وشعتـــــان ... وزغوان ونجع اقلاصــــات
وضنى كعب اولاد سليمـان ... وعرب القرية والقريـــــات
ومنفة وسعيط وقطعـــــان ... وفيه افاخر ورحيبـــــــات
وفيه ضنا موسى وزنتـــان ... وورفلة وفيه جماعــــــات
وشوق قبايل بيــــــهن زان ... فبالي ماهن منسيــــــــات
قصرت عليهن في القــولان ... بعد حكمن فيا القفـــــــلات
لهن مانطري غير احســـان ... الخير حذاهن طق وبـــــــات
عربهن بنيوا ليهن شــــان ... تعلى عالزوزة قامــــــــــــات
اقوام ناض رقيق الريغـــان ... يجو كيف شبوب النـــــــوات
حمول نحاس خفـــاف ارزان ... يجو عالشهوة في الندهات
قرومة كسارة طليـــــــــان ... جرايرهم مش مغبيـــــــــــات
في محروقة وام الجرسان ... وفي مرسيط والبويــــــــرات
وقندولة وتونين وغـــــان ... وبير الميص والكويفــــــــــات
وفي الهيرة ووادي الغزلان ... وقصر اسمى الحميـــــــرات
وفي لحشادية وشتـــــوان ... وجليانة وفي لحسيـــــــات
وفي بوغرة والحــــــوران ... وللا وبيار الــــــــــــــزوزات
وفي القرضابية ونيـــــان ... وفي سانة وفي السلامـــات
وفي الفطيمية ودوفــــان ... وفي عيون الذبان وغـــــــات
وفي انجيلة وقصر السلطان ... وفي الكفرة وبير كتيتـــات
وفي نالوت وفي الغيـران ... وفي لمشرك والقصبــــــــات
وسبها وسيدي بوحســان ... وفي بوهادي ولحقيفـــــــات
وفي الهاني وفي راس الهان ... وفي سلنطة وبير الزغرات
عرب ماودو للعدوان .. الا الذكير .. الماضي شفره والقزيــــــر
ولاتوا لاصار بيان .. يجو في مسير .. ومن فوق مناقيش الدير
يحامو واديهم فرسان .. اصحاب ضمير .. ومبدا مش نفاخة كير

وهي تصبحوا على خير

والله اللا شعر باهي
لكن فيه كلمات فيه ماعرفتش معناهم ياريت مرة ثانية اتوضحانا معني البعض مثل زوازل و الجازي وغيرها
ومشكور جدا جدا

زوازل:جمع زازل وهو عصا على شكل قوس توجد فالبيت وتركب فيها الطريقة والرمة
الجازي: يطلق على الغزال


ولكم تحياتي

السلام عليكم ............ تى شنو حالكم بزبط ان شاء الله طيبين وصحيحين . المهم توا يا حاج البكندا وضح لى الجماعه معنا بعض الكلمات لى مش فاهمين عاد انت وانى وغيرك من الناس فهمنا بس فى لى كتكوت :lol: مزال يعنى صغير ومش مار علليه الكلام هدا
اوكى وهىتوا السلام عليكم ونشوفكم بخير .......... ويسلام عليكم صاحب العكارى :D

اطول من قصيدة القطار؟
لي انذكرت فيها كل المناطق الليبية
وللاسف مش متذكر اسم الشاعر

منوين يا اخ بكندا انت ليبي

صحيت ياغالى عليا
يا بكندا
قويه واجد
شكرا على النقل الهادف
رايق لكن راقيلى

منور يا خوى على القصيدة الباهيا


ولكن يا خوى صاحب العكارى ممكن اتصلح من مصطلاحاتك اشوة وما فيش داعى لكلمت كتكوت

لانة مافيش حد جى من بطن امه متعلم وانت اولهم


ومنور ياخوى على القصدة وما تبخلش علينا لو فيه اكثر

قصيدة حلوة بجد لكن مانحب هالنوعية من القصائد

تمنياتي ليكم بدوام الصحة

قريت لكن زى ما قال الاخ فى كلامات مش مفهومة ما دبيك هكى كان فيها كيف تعطينا معضم معانى الكلمات

لك تحياتى

منور يا حاج على القصيدة الطويله كتر منهم

قصيدة جميلة حيث وصف الشاعر ليبيا بالوادى وعدد قبائله و اعلامها

LOBYA OUR Country
Wadi jarf

منور ياحويج ع القصيدة الرائعة ....

السلام عليكم

ابيات جميله جدا .

بارك الله فيك الحاج بكندا الرجباني .



رعايا ورياح ورجبـــــــــان ... وشد وحوته وقناشــــات



ايوا حني ;)

منور جدا وشكرا جزيلا قصيدة حلوة

تغير هدا شنو امنور و زيدنا منه مع تحياتىىىىىىىىىىىىىىىىىىىىىى

منور منور منور هلبة ياخوي الحاج بكندا ... على هذا النقل الجيد وبارك الله فيك خوي وليك مني الف سلام وبارك الله فيك على هاالمجهود الطيب ... أخوك رامي الحميدي

مشكور اخي علي المشاركه الرائعه

الكلام كله امعنا ... والكلام بلا امعنا سفاهه . كلام زين وواضح مايبي تبيين .. الكل يعرف ... يا اسياد العارفين
وللحاج باكندا .. قوله شاكرييين ..
المزيد المزيد .....

اكيد تتعتبر القصيدة ناقصة مزال مشوفت منها شي يا خوي
منور وصح ليك