ليش العيب

السلام عليكم ورحمة الله و بركاته

يقول الشاعر ونيس رمضــان





ليش العيب///// ليش الحياه ما تنعدل و تطيب يا ناس بينا

ليش يا بياعه///// في بيعكم ما عاد فيه قتاعه
عدّوا الموت ؤ قبركم والساعه///// والنار والميزان والتعذيب
روفوا بحال الناس م الطماعه///// راه الزمان اوقات له تقليب

**************************************************

*************************************

ليش يادكتور///// داير عياده عـ المريض تجور

كشفك اغلي صاعب على المقهور///// واللي مفلس ما دواه يجيب

و ايش الدبارة والمعيشة زور///// واللي مريض يريد له تطبيب
**************************************************

*************************************

ليش يا مسؤول ///// كاثر غيابك مكتبك مقفول
تارك اعمال الناس موش اوصول///// يبقوا ايراجوا فيك وانت تغيب
**************************************************

*************************************

ليش يا موعلم///// طفيت الشمعه نين فصلك ظلـّم
مهضوم حقك؟! طالبه ؤ تكلم///// لكن الواجب ما عليه تغيب
والطفل لازم ترشده وتعلـّم///// حكـّم ضميرك راه وراك حسيب
**************************************************

*************************************

ليش يا بو جار ///// تطاول على جارك بعد لقدار
من شان تحريكة عيال صغار /////والا صبايا دايرات سريب
تغلب الحزّازه ادّير نهار ///// بعد العقاله تنهبل و تخيب
**************************************************

*************************************
ليش يا شباب///// من عيبكم نقدر اندير كتاب
الظلم ما ينفع وراه حساب///// والنفس ما ترزن بلا تدريب
انتوا المستقبل إن رحتوا غاب ///// وانتوا اللي بينكم الجرح ايطيب
**************************************************

*************************************
ليش يا مسكينه///// خلّوك في ايديهم اتقول عجينه
ألبستي اللي مو لك ؤ درتي زينه///// والكحل والمكياج والتظبيب
ردي على انكانك من طينه///// من ناس ما يرضوا ابها ألسريب
لمن تلبسي ؤ تزوّقي دلينا///// لمن تعرضي واللي احذاك غريب
واجد خبر درتيه جد علينا///// خلا ّ كبير العقل كيف كيف الذيب
ردي أل عقلك وابعدي ع الشينه///// والي صبر ربي احذاه قريب
مستاسعه والا ورا تركينه///// ما تاخذي منها الا النصيب
**************************************************

*************************************
ليش الخجل متواري///// وقتاع الحياء ما عاد له شي طاري
ؤعـ المصلحه أيـبـيعوك ما لك شاري///// ؤ وقت الشدايد ما يجيك حبيب
ؤلا عاد لمة لا اهناك سهاري ///// ؤ لا عاد من ينشد نباك يجيب
**************************************************

*************************************

ليش البساطه راحت///// ؤليش ألطيابه م القلوب انزاحت
ؤ ليش الرزالة فرعنت وارتاحت///// بين الخلايق دايره تدريب
ؤ ليش المحنـّه سيبوها طاحت///// تما رفيق العمر كي الغريب
ليش الشهامه ناقصه مفقوده ///// ؤ حتى حبال الود مي مشدوده
ؤ ليش الوساطه بينا موجوده ///// ؤ ليش المصالح حكر ع الصاحيب
و العيب درنا نين فات حدوده ///// ؤ بعنا اللي مزروع قبل ايطيب
**************************************************

*************************************

ليش تغلطوا يا ناس///// وين المحبه وينهو الاحساس
خلـّوا كلام الله هو الاساس///// تحلى المعيشه بينكم و تطيب
ما عمر جاه ؤ مال جن مقياس /////ؤلا الفقر عار ؤ لا الموت غريب



وهي توا انقوللكم تصبحوا على خير

مرحبا اخي الحاج بكندا الرجباني
اشكرك على هذه المشاركة التي تطرح تساؤلات فعلاً نحتاج اليها.....ربما الاجابات قد تكون واضحة للبعض ولكنها قد تكون غائبة عن الكثيرين ...ولكليهما نحتاج هذه التساؤلات للتذكير...
سلام

بارك الله فيك ياحويج وصح لسانك

وشكور ياغالي. بالله عليك زيدنا من هالكلام زيد

هيا بالسلامة

يا حاج يا حاج والله العضيم كلامك كله عبر


صدقني انا اعجبت بي كلامك او تنسيق القافيه امتعك ابصراحه شاعر ولد شاعر او سيدك شاعر او عيله كبيره---طالعين -----------كمل انتا ياحاج

خير يا حويج منور يا خوي

كبف حالك كيف حال الصحة و شنو الاخبار

و ينك ليك مدة مغيب و الا غاطس

عموما راك تغيب علينا يا خوي

هيا توة السلام عليكم

منور يا حاج :)

انقولك:

ما ينصلح الحال بين يوم وليلة// وما ينصلح الحال في شهور قليلة
سوسنا كبر ودار انياب طويلة // وبعون الله نقدروا عليه بحيلة

واخر كلامي:
لا اتخاف ولايهمك هام // الاقلام جفت والورق انقام

السلام عليكم ورحمة الله و بركاته

خير يا شباب شن حالكم شن اخباركم ,, طيبين ان شاء الله

بارك الله فيكم على المرور ,, و صحيتوا على التشجيع و ربي

يحفظكم ان شاء الله

خوي النجها شن حالك يا طيب ,, الكلام هدا مش اني الي كاتبه

و كاتب اسم الشاعر فوق ,, لكن عندي هواية حفظ الشعر الشعبي

و قرايته اكثر من تأليفه ,, يعني قاعد شاعر مبتدئ ,,عندي جدي حق

و جداي شعرا ,, و الخير و البركة فيك انت يا غالي ,, اقريتلك القصائد

الي كاتبهم و ما شاء الله مية مية ,, و ان شاء الله نوصلوا لي مرتبة

الشعراء المحترفين ,,

منور خوي بودينة على الابيات الجميلة ,, و يعطيك الصحــة ,, استمر يا غالي


وهي تصبحوا على خير

منور يا رجبانى بارك الله فيك زايدة معاك

منور ياحاج .... من 2003 .... ولحد الآن نهاية 2008 ..... وإشبح ليأمتا .... والوضع باق كما هو عليه ....
مفارقة عجيبة والله ....
بارك الله فيك .... وممكن سنة 2020 نرجولها تاني ونشوفوا شن تغير كان أحنا من أهل الدنيا ...

شكور يا حاج على الشعر بجد روعة

تسلم وبارك الله فيك

تقبل مروري

ليش يا موعلم///// طفيت الشمعه نين فصلك ظلـّم
مهضوم حقك؟! طالبه ؤ تكلم///// لكن الواجب ما عليه تغيب
والطفل لازم ترشده وتعلـّم///// حكـّم ضميرك راه وراك حسيب



ليش تغلطوا يا ناس///// وين المحبه وينهو الاحساس
خلـّوا كلام الله هو الاساس///// تحلى المعيشه بينكم و تطيب
ما عمر جاه ؤ مال جن مقياس /////ؤلا الفقر عار ؤ لا الموت غريب


رائع مااخترت حاج بكندا. وزى ما قال الشيخ حسنى ما شى تغير.